Zanter 2005 hëlt Lëtzebuerg aktiv un der Europäescher Mobilitéitswoch deel, déi all Joer vum 16. bis den 22. September stattfënnt.

D’Zil vun dëser Campagne ass et engersäits, Stied a Gemengen, hir Awunner*innen souwéi Grenzgänger*innen fir nohalteg Mobilitéit ze sensibiliséieren an anerersäits d’Gesondheet an d’Liewensqualitéit vun der Bevëlkerung ze verbesseren.

Dozou encouragéiert de Ministère fir Mobilitéit an ëffentlech Aarbechten d’lokal Autoritéiten, nohalteg Verkéiersmoossnamen anzeféieren an ze fërderen, déi hir Awunner*innen dozou invitéieren, Alternativen zum Auto auszeprobéieren.

D‘Thema fir d'Editioun 2026 ass 'Mobilitéit fir jiddereen' an huet als Zil, den Zougang zu Transport fir jiddereen ze garantéieren, onofhängeg vum Akommes, dem Wunnsëtz, dem Geschlecht oder den individuelle Fäegkeeten.

Vill Leit gi mat de Käschten oder engem Manktem u Transportméiglechkeeten konfrontéiert, wat hiren Zougang zu Aarbecht, Bildung an wesentlechen Déngschter limitéiert; dëst Phänomen ass als „Verkéiersaarmut“ oder „Mobilitéitsprékaritéit“ bekannt.

Am Joer 2026 setzt d’Europäesch Mobilitéitswoch sech fir disponibel, accessibel, bezuelbar, inklusiv a sécher Transportmëttel an.

Den ëffentlechen Transport dréit dozou bäi, datt zu Fouss goen a Vëlofueren fair Optioune fir jidderee sinn.

Den europäesche Sozial- a Klimafong hëlleft de Gemengen an de Stéit, sech un dës Verännerungen unzepassen, andeem bezuelbar a nohalteg Mobilitéitsléisungen ënnerstëtzt ginn.

D’europäesch Kommissioun huet Recommandatiounen fir d’Memberstaaten verëffentlecht, fir  Politiken z’entwéckelen, déi d’Mobilitéitsprékaritéit reduzéieren a fair Verkéierssystemer fërderen, ouni iergendeen auszeschléissen.

All Joer mobiliséiere sech d’Lëtzebuerger Stied a Gemenge a Kooperatioun mam Ministère fir Mobilitéit an ëffentlech Aarbechten am Kader vun der Europäescher Mobilitéitswoch.

Entdeckt de komplette Programm vun all hiren Aktivitéiten a maacht mat bei der Aktioun!

Dir sidd eng Firma oder eng Schoul

Wann Dir eng Aktioun duerchféiert, déi d’Iddi vun enger nohalteger urbaner Mobilitéit fërdert, da schreift Iech bei der Initiativ „Mobility Action“ vun der Europäescher Kommissioun an.

Dir sidd eng Gemeng oder eng Stad

Organiséiert Aktivitéite vum 16. bis den 22. September, setzt permanent Moossnamen ëm oder bedeelegt Iech um autofräien Dag, fir Iech fir d’Europäesch Mobilitéitswoch anzeschreiwen.